નવી દિલ્હી
ભારતમાં કોરોના વાયરસના વધતા જતા કેસ તણાવમાં વધારો કરી રહ્યા છે. છેલ્લા ૨૪ કલાકમાં કોરોનાના કેસમાં મોટો વધારો થયો છે. સ્વાસ્થ્ય મંત્રાલયે જણાવ્યું કે દેશમાં કોરોનાના ૨,૯૨૭ નવા કેસ નોંધાયા છે. રિપોર્ટ અનુસાર આ દરમિયાન ૩૨ લોકોના મોત પણ થયા છે. દેશમાં કોરોનાથી મૃત્યુઆંક હવે ૫,૨૩,૬૫૪ પર પહોંચી ગયો છે.આ ઉપરાંત છેલ્લા ૨૪ કલાકમાં ૨,૨૫૨ લોકો કોરોનાથી સાજા પણ થયા છે. જો કે, સક્રિય કેસોની સંખ્યામાં પણ વધારો થયો છે. હાલમાં કોરોનાના ૧૬,૨૭૯ દર્દીઓ સારવાર હેઠળ છે. અત્યાર સુધીમાં કુલ ૪,૨૫,૨૫,૫૬૩ લોકો સાજા થયા છે જયારે ૪,૩૦,૬૫,૪૯૬ લોકોને ચેપ લાગ્યો છે.તમને જણાવી દઈએ કે આ સતત આઠમો દિવસ છે જયારે કોરોનાના બે હજારથી વધુ કેસ નોંધાયા છે. દેશમાં ૧૯ એપ્રિલ, ૨૦૬૭, ૨૦ એપ્રિલ, ૨૩૮૦, ૨૧ એપ્રિલ, ૨૪૫૧, ૨૨ એપ્રિલ, ૨૫૨૭, ૨૩ એપ્રિલ, ૨૫૯૩, ૨૪ એપ્રિલ, ૨૫૪૧ અને ૨૫ એપ્રિલના રોજ, ૨,૪૮૩ નવા કેસ નોંધાયા હતા.દરમિયાન, ઈન્ડિયન કાઉન્સિલ ઓફ મેડિકલ રિસર્ચ (ICMR) એ જણાવ્યું હતું કે ગઈકાલે ભારતમાં કોરોનાવાયરસ માટે ૫,૦૫,૦૬૫ નમૂનાઓનું પરીક્ષણ કરવામાં આવ્યું હતું. ગઈકાલ સુધીમાં કુલ ૮૩,૫૯,૭૪,૦૭૯ સેમ્પલ ટેસ્ટ કરવામાં આવ્યા છે.